AF222a: 15v
Dün [ü] gün raqṣ ėder eflāk Saña ʿāşıq seni özler
Seḥerde açılan güller Öten şūrīde bülbüller
Benefşe lāle sünbüller Saña ʿāşıq seni özler
Eger ḥūrī eger ġılmān Eger mālik eger rıżvān
Sekiz cennet yedi nīrān Saña ʿāşıq seni özler
Eger mihr ü eger ẕerre Eger baḥr u eger zerre
Eger Ṭūbā eger Sidre Saña ʿāşıq seni özler
Eger ġāyib eger ḥāżır Eger bāṭın eger ẓāhir
Eger müʾmin eger kāfir Saña ʿāşıq seni özler
Hüdāyīye ėre ḥālāt Viṣāline bula leẕẕāt
Efendi cümle mevcūdat Saña ʿāşıq seni özler
[Yūnus]
velehü ayżan
Şol ʿālemde seyyāḥ olup ararsan [!]
ʿAbdülqādir gibi sulṭān bulunmaz
Ceddi Muḥammeddür eger ṣorarsan
ʿAbdülqādir gibi sulṭān bulunmaz
Çün yanı dervīşleri dirilür
Qudretinden naṣībleri vėrilür
Erkānı-ylā iḥyāları ṣorılur
ʿAbdülqādir gibi sulṭān bulunmaz
Yėr ü gögi ḥaqq yaradup düzeli
Gendü naẓar ėtmiş aña ezelī
Evliyānūn sevgilüsi güzeli
ʿAbdülqādir gibi sulṭān bulunmaz
Mevlām yüce devlet vėrmiş başına
Meşġūl olmış yaradanuñ işine
Resūl ile Allāh ile eşine
ʿAbdülqādir gibi sulṭān bulunmaz